hrokafull svör

Ég skil ekki hvernig nokkur maður ætti að geta verið ánægður með svör eins og þessi. Spurningarnar voru settar fram á faglegan máta, og flestar í mörgum liðum. Svörin svöruðu hinsvegar aldrei hverjum lið fyrir sig, og voru bæði ófagleg og uppí það að jaðra við að vera dónaleg. Síðasta svarið rekur þannig síðasta naglann í kistuna, þar sem svarið er einfaldlega - "þessi spurning skiptir ekki máli"! Hrokinn er náttúrulega bara yfirgengilegur.

Jújú eflaust voru margar af þessum spurningum tilgangslausar og áttu ekki rétt á sér, en þær eru samt spurningar sem ber að svara virðulega og a.m.k. látið lýta út fyrir að það sé eitthvað lagt í svörin. En að svara spurningu á þann veg að hún skipti ekki máli, jafnvel þó það sé satt, er náttúrulega bara ekkert annað en helber dónaskapur. Kannski FLgroup finnist dónalegt að spyrja þessara spurninga í gegnum fjölmiðla eins og Vilhjálmur er að gera (sem mér að vísu finnst mjög kjánalegt ef hann hefur ekki látið reyna á að fá þessi svör prívat) þá er nú alveg ótrúlega vitlaust og barnalegt að ætla bara að svara í sömu mynt.

Ég sé ekki annað en að ímynd FL group versni meira við svona framgang, heldur en sú staðreynd að þeir fóru næstum því á hausinn á síðasta ári...

Vilhjálmur ósáttur við svör FL Group

rangt

Ledger lést ekki af of stórum lyfjaskammt skv krufningu. Það er stór munur á of stórum lyfjaskammt eða samlegðaráhrifum mismunandi lyfja, sem hvert um sig gæti hafa verið í mjög hæfilegum skammti.

Réttast hefði bara verið að segja að hann hefði látist vegna misnotkunar á lyfjum - í stað þess að elta tískuorð eins og "ofneysla". Það er einfalt og það er ekki verið að fara með rangt mál...

Rétt skal vera rétt... 

Dóttir Ledgers arflaus

í steininn með hann...

mér finnst bara sjálfsagt að menn fari í steininn eftir svona hefnibrot eins og keane viðurkenndi. Hvaða mismunur er á venjulegri þjóðfélagslegri hegðun og hegðun innan á fótboltavellinum. Hefnibrot eins og þetta er bara einfaldlega líkamsárás, ekkert annað, og það bíttar engu máli hvort hinn hafi hrækt framan í hann eða ekki - þetta á bara ekki að líðast.

Hvaða rugl er að maður eins og hann fái að vera fyrirmynd heils fótboltaliðs, sem og hann þarf að vera sem þjálfari. Það hefði verið eitt ef hann hefði getað haldið þeirri ímynd áfram að þetta hefði verið óvart - en að maðurinn sé búinn að viðurkenna að hann hafi verið að hefna sín verðskuldar ekkert annað en ævilangt bann frá fótbolta.

 

Roy Keane: Mér hefði verið stungið í steininn

hvað þykist hann vita...

Já reynsluboltinn Hamilton heldur virkilega að hann geti eitthvað fullyrt hvar ferrari eða mclaren stendur frekar en aðrir ökumenn. Þessi síðasta æfing sem hann talar um, þá voru þeir ferrari og hamilton svo langt frá toppinum á tímatöflunni að nákvæmlega ekkert mark er að taka á nokkrum getgátum dregnum af þessum tímum. Þetta ræðst ekkert fyrr en í fyrsta móti eða jafnvel öðru móti (þar sem melbourne á að vera "öðruvísi" braut) - og allar þær fullyrðingar hvar bílarnir standa eru bara ekkert annað en getgátur. Og ef ég vildi láta einhvern ökumann koma með raunhæft mat á stöðu bíla, þá myndi ég svo sannarlega ekki spyrja þann ökumann sem er bara með eins árs reynslu úr formúlu1, hversu góður sem sá ökumaður kann að vera. 

Tala minna, gera meira - eitthvað það besta í fari raikkonen, bæði þegar hann var hjá mclaren og núna hjá ferrari. 

Hamilton segir Ferrari og McLaren standa jafnfætis

af hverju?

af hverju ætti þessi skoðun hennar að koma aftan að henni? Það er alveg ljóst að það eru ekki öll kurl komin til grafar í þessu 9/11 máli, og held hún hafi aðeins verið að segja að það hafi alveg eins getað verið bandaríkjastjórn sem var ábyrg fyrir hruni turnanna. Og hvað er að því að velta því fyrir sér? Það er allavega mun líklegri skýring en að þetta hafi gerst eins og bandaríkjamenn hafa útskýrt fyrir okkur.

Það að þetta eigi hugsanlega eftir að koma í bakið á henni að hafa haft þessi ummæli sýnir bara svart á hvítu hversu mikið fasistalýðveldi bandaríkin eru að verða....

Ég er bara ánægður að það eru til frægir/áhrifamiklir bandaríkjamenn sem þora að velta upp spurningum við fáránlegum útskýringum bandaríkjastjórnar á 9/11 í stað þess að vera eins og aðrir og trúa skilyrðislaust öllu því sem er logið að þeim...

Segir ummæli Cotillard slitin úr samhengi

legg til að hætta þróun vetnistækninnar...

...sem þeim orkugjafa sem tekur við af bensíni.

Held að Ísland sé nánast eina þjóðin sem almennt telur að vetni sé framtíðin. Maður hefur það á tilfinningunni, þegar maður talar við erlenda menn um þetta mál, að við séum að gera sjálf okkur að fíflum með því að þykjast ætla að búa til hér fyrsta vetnissamfélagið. Fólk gleymir oftast að vetni er ekki orkulind heldur geymslumáti á orku, og þessa orku þarf að framleiða. Vetni er hægt að framleiða á umhverfisvænan máta hér á landi, í þeim skilningi að engar gróðurhúsalofttegundir svokallaðar losna við framleiðsluna á rafmagninu sem þarf í rafgreininguna á vatni, þó "umhverfið" fái kannski að kenna á því. Mikill meginhluti allrar raforkuframleiðslu í heiminum felur hinsvegar í sér losun á gróðurhúsalofttegundum, bruni á kolum og olíu, og því væri í flestum tilfellum ekki verið að losa sig við vandamálið, heldur aðeins færa það frá farartækjum yfir í raforkuframleiðsluna - sem er nákvæmlega það sem er gert með hinum "umhverfisvæna" Prius. Hugtakið umhverfisvænt er náttúrulega algjörlega ofnotað, þar sem aðeins er tekið mark á lokaskrefinu, en ekki hvað býr því að baki. Ekki má gleyma þeim vinsæla misskilningi að gróðurhúsalofttegundum sé að kenna um hitun jarðar...

Það má teljast verkfræðileg hugsun að finna einföldustu lausnina á ákveðnu vandamáli. Það að nota vetni í staðinn fyrir bensín er náttúrulega bara flóknasta lausnin á útblástursvandamálinu. Einfaldari lausn, í staðinn fyrir hreint vetni, er að nota etanól eða metanól - sem minnka útblástur, eru á fljótandi formi, og það sem meira er, virka á núverandi bensínvélum. Önnur er að láta núverandi bíla nýta orkuna betur, eins og t.d. vakning er í formúlu 1 (sem að lokum skilar sér í framleiðslubílum) um að nýta varmaorkuna sem myndast í bremsum og minnka þannig bensíneyðslu / auka hraða. 

Þó framtíðin feli eflaust í sér bíla með engan útblástur sem eflaust vinna á vetni, þá þarf bara að leysa svo mörg vandamál áður en það er praktískt að það er fáránlegt að vera búinn að búa til einhvern tímaramma um hvenær íslenska vetnissamfélagið verður að veruleika. Ég veit ekki hvort þetta var bjartsýni eða athyglissýki, en þetta vetnisævintýri á ekki stoð í raunveruleikanum, ekki í náinni framtíð í það minnsta. Verði vetni framtíðarorkugjafi á bílum hef ég í það minnsta enga trú á að það muni taka við af bensíni, þó það gæti tekið við af t.d. etanóli, metanóli eða einhverju öðru sem framtíðin leiðir af sér...

en þetta er allt að sjálfsögðu bara mínar skoðanir -  en eftir dóm héraðsdóms í vikunni virðist þurfa að taka það fram hér eftir ...

Lagt til að hraða þróun vetnistækninnar

veruleikafirrtur

Hef aldrei skilið þessa vitleysu að vilja ekki her á Íslandi - en það er e.t.v. vegna þess að ég er í þeim skilningi ekki einhver brjálaður friðarsinni. Ekki það að ég vilji að það séu stríð útum víða veröld, og auðvitað vill maður það helst að "öll dýrin í skóginum séu vinir". En ég er ekki svo einfaldur að halda það, að þó það sé kannski ekki beint stríð í gangi nálægt okkur, að það skilgreinist sem einhver friður. Jújú eflaust vill Steingrímur meina það að ef það er enginn her hér nálægt okkur, að það kúpli okkur frá öllu og geri okkur hlutlaus í hverju því stríði sem kann að skella á...Think not! Það er langt frá því nóg til að gera okkur hlutlaus.  Það að það sé enginn her eða varnir hérna gerir okkur ekki hlutlaus, það gerir okkur bara varnarlaust auðvelt skotmark. Svo er grundvallarmunur á því hvort herinn umræddi sé til staðar til sóknar (herstöðvar eins og bandaríkjamenn reka í ýmsum löndum við miðjarðarhaf) eða til varnar. Ég væri mótfallinn því að hér væri her sem gæti farið í útrás, ef svo má segja, en það er allt annað mál að hafa einhvern her hér til sýnis eins og hefur verið. En ég hef ekki séð þá friðarsinna sem vilja engan her gera nokkurn einasta greinarmun á þessu - her sé bara her og her þýði bara stríð. En svo sé ég bara ekki hvað er að því að það sé staðsettur her á Íslandi, svona hálfpartinn til sýnis eins og það hefur verið. Þetta kom með miklar tekjur inní þjóðarbúið án nokkurra teljandi neikvæðra áhrifa, svo ég viti. Vilja menn ekki hafa her hér til að gefa gott fordæmi fyrir frið, að Ísland sé friðsælt því það sé enginn her til staðar? Finnst fólki kannski að við lifum á friðartímum nú til dags, að það sé ekkert að óttast, og því her, sérstaklega á Íslandi, sér bara óþarfur? Ef hann er óþarfur, hvað með það, svo lengi sem við erum ekki að tapa á því. Eða heldur fólk kannski að afstaða Íslands til stríðs sé ákvörðuð með því hvort hér sé staðsettur her eða ekki?

Spurningin er því e.t.v. bara sú. Hvort er það ég sem er veruleikafirrtur eða Steingrímur?  

Síðasta skrefið að fullri inngöngu Íslands í NATO

að sjálfsögðu

já þarna hittu rússar að sjálfsögðu naglann á hausinn! Auðvitað eru þeir bara að prófa eigin getu í að skjóta niður gervihnetti. Það getur svo velverið að útskýring bandaríkjamanna standist, að það myndist eitthvað hættulegt gas, en hverjum dettur í hug að taka nokkurt einasta mark á því sem þeir segja nú til dags.

Bandaríkjamenn sakaðir um græsku í gervihnattamáli

góðar fréttir

Það hljómar svolítið skringilega að HD-DVD ætli að játa ósigur gagnvart blu-ray opinberlega, en þar sem þeir eru að stórtapa á þessu þá er það kannski eðlilegt. Held reyndar að það hafi ekki verið neitt brjálæðislega mikill munur á sölutölum HD-DVD og Blu-Ray mynda sem slíkra, munurinn sé að mestu í sölutölum á spilurum. Playstation 3 ræður þar náttúrulega mestu fyrir Blu-Ray, þar sem rúmar 10 miljónir tölva með Blu-Ray spilara hafa selst í heiminum, ásamt einhverjum slatta af standalone Blu-Ray spilurum. Hinsvegar hafa aðeins í heildina tæplega 1 miljón HD-DVD spilara selst í heiminum. Sigurinn var því kannski svo gott sem unninn þegar ljóst var að t.d. microsoft ætlaði ekki að hafa HD-DVD spilara standard í Xbox360. Hægt er að kaupa aukalega HD-DVD spilara fyrir xbox360, en þær sölutölur eru innifaldar í þessari 1 miljón. Það að Blu-Ray sé að vinna þetta hlýtur að vera mikill sigur fyrir Sony, og Playstation 3, því það er alveg ljóst að Sony er búið að eyða gríðarlegum fjármunum í að koma þessum staðli á markaðinn. Hver PS3 tölva kostaði t.a.m. 800$ í framleiðslu en var seld á 500$  fyrst þegar þær komu á markað. Þó kostnaðurinn hafi lækkað um helming í dag, 400$ á vél, þá er nokkuð ljóst að Sony er enn að tapa á hverri vél sem er framleidd þó hún sé seld á svipuðu verði. Leikirnir að vísu skila inn einhverjum hagnaði þar á móti, en vinna ósennilega upp allt tapið.

Fyrir notandann eru þetta góðar fréttir, því ég tel að samkeppni á þessum markaði hafi hingað til haldið uppi verðinu á bæði diskum og spilurum.   Þegar ljóst er hvaða staðall fyrir næstu kynslóð dvd diska er ofan á getur fólk hætt að lifa í óvissu og þorir að skella sér á næstu kynslóðar dvd spilara. Salan á Blu-Ray mynddiskum hlýtur þar af leiðandi að aukast sem hlýtur að lækka verðið á þeim niður í ásættanlegt verð fyrir DVD mynd. Tími næstu kynslóðar dvd spilara er klárlega kominn, vegna gríðarlegrar útbreiðslu HD-ready (720p) og Full-HD (1080p) LCD sjónvarpa sem hafa gæði langt framyfir hinn venjulega gamaldags DVD disk.

Hvítt flagg hjá HD-DVD?

sneaky sneaky ...

líklega munu bandaríkjamenn segja að hnötturinn verði skotinn niður því það sé svo hættulegt að láta hann falla til jarðar, bæði vegna fallhættu eða það að hann innihaldi alveg rosalega eitruð efni. En eflaust gera flestir sér grein fyrir því að líklegri skýring er að hnötturinn sé sem slíkur  eitthvert hernaðarleyndarmál sem engir nema hátt settir bandaríkjamenn mega sjá. Tæknin í svona njósnatunglum held ég sé líka oftast mjög viðkvæm, enda flest ef ekki allt bakvið svona hluti state-of-the-art

Bandaríkjamenn skjóta niður njósnahnött