evolution or revolution

Það er í raun hræðilegt að sjá hvaða klofningur er farinn að myndast meðal eyjamanna með þessi samgöngumál. Samstaða var um göng, það er alveg klárt mál, en þegar ljóst er að þau eru ekki næst á dagskrá skiptast menn í þessar tvær fylkingar eins og svo þekkt er. Stuðningsmenn bakkafjöru halda að það séu langflestir á þeirra máli, og það nákvæmlega sama á við um andmælendur hennar. 

Ég vill líkja Bakkafjöru við rússneska rúllettu. Bakkafjara  getur um leið verið bylting og banabiti fyrir Vestmannaeyjar - allt eftir því hvort framkvæmdin heppnast vel eða ekki. Held það sé ekki hægt að neita því að báðir möguleikar séu fyrir hendi. Kannski finnst andmælendum bakkafjöru ekki ásættanlegt að það sé spilað svona með framtíð eyjanna, og mér finnst það alveg skiljanlegt.  Nýtt lúxusskip sem gengi á innan við 2 tímum til Þorlákshafnar yrði aldrei bylting og heldur enginn banabiti. Evolution. Það er án efa öruggi valmöguleikinn, sem gæti að sjálfsögðu aldrei haft jafn mikil jákvæð áhrif á eyjarnar, og yrði ólíklega til þess að snúa íbúaþróun eyjanna við.

Þá er bara spurningin; hversu líklegt er að Bakkafjara verði bylting fyrir eyjarnar og hversu líklegt er að hún verði þeim banabiti? Er það áhættunnar virði að fara útí Bakkafjöru, eða er kannski byltingin sem það hugsanlega fæli í sér hreint og beint bara lífsnauðsynleg fyrir framtíð Vestmannaeyja?

Ég er kannski bara að gera mér grein fyrir því núna, en ég held svei mér þá að byltingin sé nauðsynleg! Það er náttúrulega erfitt að leggja mat á áhættuna. Ég hef bæði verið með og á móti Bakkafjöru og ég vona að það sé nokkurn veginn hlutlaust mat að segja að það séu allavega töluvert meiri líkur á því að Bakkafjara verði bylting fremur en banabiti. Neyðumst við ekki til að sætta okkur við áhættuna sem felst í Bakkafjöru, bíta á jaxlinn, og vona innilega að heppnin verði ofan á? Jú, algjörlega!

Gerum nú ráð fyrir að hætt væri við Bakkafjöru. Nýr hraðskreiðari Herjólfur myndi þá að sjálfsögðu hafa jákvæð áhrif á núverandi íbúa eyjanna, en til lengri tíma litið gerir hann ekki nóg og kemur ólíklega í veg fyrir fólksfækkunina. Verði sama íbúaþróun þangað til kæmi næst að því að endurskoða samgöngur við Vestmannaeyjar, eftir 10-20 ár, yrði jafnvel ekki lengur forsenda fyrir því að fara útí byltingu á samgöngum, hvorki göng né Bakkafjara. 

Því má kannski vera að nú sé tíminn, hugsanlega eini tíminn, sem eyjamönnum býðst að fá byltingu í samgöngum. Fyrst göng eru ekki í boði þá einfaldlega neyðumst við til að taka áhættuna með Bakkafjöru því til lengri tíma litið er jafnvel meiri áhætta falin í því að umbylta ekki samgöngum við Vestmannaeyjar núna. Jú, maður hefði fremur kosið að Bakkafjara og áhrif hennar væru betur rannsökuð, og af færari aðilum, áður en ráðist er í framkvæmdina. En því miður er ekki alltaf allt eins og best á verður kosið. Þetta er bara spurning um að grípa gæsina meðan hún gefst!

Ég er alls ekki sammála því, sem svo margir vilja meina, að ef Bakkafjara verður að raunveruleika verði göng aldrei að raunveruleika. Hafi Bakkafjara þessi jákvæðu áhrif sem vonast er til verður bara meiri forsenda fyrir því að fá göng. Göng eru í dag hagkvæmasti kosturinn ef þau reynast möguleg á eðlilegu verði og Bakkafjörusamgöngur koma tæpast til með að verða ódýrari í rekstri en núverandi samgöngur. Þannig myndi aukinn straumur til og frá eyjum með vel heppnuðum Bakkafjörusamgöngum kalla á hagræðingu, og þar eru göng klárlega besti kosturinn til lengri tíma litið - jafnvel þó búið sé að byggja Bakkafjöru.

 

Ég held að menn hljóti að gera sér grein fyrir því að þessi undirskriftarsöfnun er einfaldlega alltof seint á ferðinni og að ferlið verði ekki stoppað héðan í frá. Er þá bara ekki kominn tími til að gera það sem öllum er fyrir bestu og sameinast um að sætta sig við Bakkafjöru! Já það er áhætta falin í þessu, en hún er kannski bara lífsnauðsynleg fyrir framtíð Vestmannaeyja - og þegar uppi er staðið er kannski meiri áhætta falin í því að kjósa ekki byltingu.

 Svo finnst mér Bæjarstjórn Vestmannaeyja, og þá sérstaklega bæjarstjórinn Elliði Vignisson, vera að fara kolranga leið við að svara þessari undirskriftarsöfnun. Að gera lítið úr því hversu margir hafa í raun skrifað undir gerir lítið annað að auka klofninginn og hvetja restina sem á eftir að setja nafn sitt á listann til að drífa í því.  Mun réttara hefði verið að loksins reyna að koma fólki í skilning um framkvæmdina, og viðurkenna að um áhættu sé að ræða, en þessi áhætta sé jafnframt nauðsynleg - í stað þess þykjast heilaþvo fólk með því einfaldalega að segja "Bakkafjara er góð". Ég er búinn að vera á móti þessari framkvæmd þangað til í dag, í raun þangað til að ég skrifaði þessa færslu. Ég vona að Elliði einbeiti sér nú að því að fá samstöðu meðal eyjamanna um Bakkafjöru og reyni að koma þeim í sama skilning á Bakkafjöru og t.d. ég varð fyrir í dag. Mér finnst allavega að það væri hræðilegt ef þessi klofningur myndi haldast meðal eyjamanna...

Tilfinningahiti í Eyjum

eins gott ....

... að þeir hafi á endanum rétt fyrir sér - annars eiga þeir ekkert annað skilið en að missa vinnuna sína.

það er ekki hægt að horfa framhjá hrokanum í þessum mönnum, þeir virðast ekki einu sinni velta fyrir sér þeim möguleika að þeir gætu haft rangt fyrir sér, né það sem verra er þeir virðast ekki einu sinni leggja mat á hversu líklegt sé að þeir hafi rangt fyrir sér. 

það var ekki beint traustvekjandi eftir yfirlýsingar þeirra að ölduhæð í bakkafjöru færi aldrei yfir fjóra komma eitthvað metra, ekki í verstu sunnanveðrum sem mögulega geta skollið á, að síðar í ferð þeirra til bakkafjöru á lóðsinum í tiltölulega skaplegu veðri skyldi mæling þeirra á ölduhæð vera í eða yfir þeirra uppgefna hámarki. Svo í þessu myndbandi á www.strondumekki.is þar sem lóðsinn fór í ferð til bakkafjöru í sunnan 14 m/s, sem á eyjamælikvarða er hálfgert logn, var áætlað að brotið sem skipið fékk á sig hafi verið 5 metrar. Menn hafa nú verið að benda á að 5 metra alda sé nú lítið fyrir þetta stóra skip sem á að sigla þarna á milli - þó að þessi 5 metra alda sé að sjálfsögðu yfir því hámarki sem siglingamálastofnun sagði að myndi vera. [endilega leiðrétta mig ef ég er eitthvað farinn að ryðga í þessum tölum hérna]

ég vona innilega að þeir hjá siglingamálastofnun hafi rétt fyrir sér, en komi til þess að þeir hafi virkilega rangt fyrir sér þannig þurfi annaðhvort að hreint og beint hætta við eða fara útí lengri hafnargarða sem kosta áætlaða 20 miljarða í staðinn fyrir 5 sem áætlað er núna - þá finnst mér liggja ljóst fyrir að allir sem eiga hlut að máli hjá stofnuninni ættu að verða reknir.

Ég er nú eiginlega kominn á það mál að bakkafjara sé næst besti kosturinn á eftir göngum - bara svo lengi sem hún tekst til eins og menn vonast til og spá fyrir í dag.  Ég fer samt ekki af þeirri skoðun að bakkafjara er gríðarlega áhættsöm framkvæmd fyrir bæði ríkið og eyjamenn - sem er kannski ekki ástættanlegt fyrir framtíðarsamgöngur við eyjar ....

Ferðir falla niður í 5-9 daga á ári

no way..

ég sé ekki að alonso fari til ferrari meðan raikkonen er þar. Ég get ekki ímyndað mér það að raikkonen fari frá ferrari í bráð, þannig að fyrir mér er ekki séns að alonso sé á leiðinni til ferrari. Annað en McLaren held ég að ferrari sé búið að átta sig á því að hið fullkomna ökumannapar er ekki tveir jafn góðir ökumenn, heldur mun frekar duo eins og þeir hafa verið með undanfarin ár þar sem annar ökumaðurinn nær í ökumannstitilinn meðan hinn er nógu góður til að raka inn nógu mikið af stigum til að ná í bílasmiðatitilinn. Þegar ökumennirnir eru álíka góðir og keppa innbyrðis um heimsmeistaratitilinn til enda, eins og hjá McLaren í fyrra, þá er skiptingin á stigum einfaldlega ekki til þess fallin að ná í ökumannstitilinn. Í raun held ég að ferrari finnist massa vera næstum því of góður til að gegna því hlutverki í liðinu sem hann var ráðinn í - og ég held þeir myndu tæpast reyna að leysa það vandamál með því að ráða alonso í staðinn.

Mateschitz gefur til kynna að Alonso fari til Ferrari

glæsilegt

Mér lýst vel á þessa undirskrifarsöfnun, þó hún komi líklega of seint til sögunnar. Ég hvet samt fólk til að skrifa undir, þó það sé ekki nema bara til þess að sýna hver sín skoðun er á þessu og að eyjamenn séu ekki almennt fylgjandi Bakkafjöru - eins og bæjarstjórn vestmannaeyja hefur gefið í skyn.

 Ég tók saman um daginn hvaða kosti og galla ég sé við Bakkafjöru:  http://besserviss.blog.is/blog/besserviss/entry/492678/ 

Safna undirskriftum gegn Bakkafjöru

eins og Hannibal Lecter?

50 spor þykja manni nú ekkert smávægileg meiðsli....en kannski er maður bara svona mikil væmiltíta.

Annars, ef hann fékk skurð í vör og höku og þarf að hafa hlíf yfir því til viðbótar við þessa skemmtilegu  húfu hans núna má búast við að hann verði ansi skrautlegur. Mér dettur bara í hug Silence of the Lambs þar sem Hannibal Lecter var með sína frægu andlitsgrímu. Spurning hvort það myndi þá einhver þora inní vítateig Chelsea með Cech þar milli stanganna ....

Cech: Þetta er ekkert alvarlegt

smásekt

fullmikil er nú æsifréttamennskan í þessari frétt - 285þús kr er nú bara pinkulítil sekt á f1-mælikvarða. Macherano hjá liverpool fékk tveggja-vikna-launa sekt nú í vikunni, sem samsvarar sennilega hátt í 10 miljónum ef ekki meira.  Raikkonen er með mun hærri tekjur en Macherano þannig að segja að þetta sé stórsekt er bara algjörlega  fáránlegt. Veit líka ekki betur en sektirnar í f1 hafi líka verið töluvert hærri en þetta, og hefði þótt 5000 evru sekt í nokkuð góðu samræmi við aðrar sektir - þó maður taki ekki með í myndina 100 miljón dollara sektina sem mclaren fékk í fyrra.

Það að raikkonen sé að fá þessa sekt finnst mér því eiginlega ekki fréttnæmt ...  enda t.d. ekkert um málið á www.f1-live.com 

Räikkönen fær stórsekt

algjörlega fullkomlega fáránlegt og óréttlátt

Ég vissi nú ekki um hvað þessi hvíldartímaregla fæli í sér sem bílstjórar hafa verið að kvarta yfir fyrr en nú. Mikið rosalega er þetta fáránleg regla sérstaklega með tilliti til þess að á Íslandi er augljóslega engin aðstaða til að framfylgja svona henni. Ekki þykir mér ólíklegt að þessi regla hafi verið "fundin upp" samkvæmt fordæmi annarsstaðar úr heiminum, en í einhverri heimsku og fljótfærni hafi algjörlega gleymst að skoða hvað lægi að baki til að réttlætanlegt væri að svona regla væri í gildi. Mér finnst hreint með ólíkindum að bílstjórar þurfi að fara í jafn miklar aðgerðir og þeir hafa gert til að fá þessi heimskulegu mistök leiðrétt. Enn ótrúlegra er hversu lítinn stuðning þeir fá frá þingmönnum, og þá er alveg sama hvort þeir þingmenn eru í stjórnarandstöðu eða ekki, sem virðast ekki einu sinni sýna þessu skilning að neinu marki - og sýnir þannig bara hversu fáránlega veruleikafirrt starfstétt það er.

Annars  finnst mér allar þær reglur sem takmarka hversu lengi maður má vinna vera ekkert nema skerðing á persónufrelsi, þó ég geti skilið að þær séu til staðar til að vernda starfsmanninn frá vinnuveitandanum. Reglunni á þannig einungis að vera beint að vinnuveitandanum, og að starfsmaðurinn sjálfur sé sektaður í stað fyrir vinnuveitandann er náttúrulega alveg forkastanlegt. Ég veit bara að ég ætti erfitt með að sætta mig við það ef mér sjálfum væri bannað að vinna eins lengi eins og ég vill með þeim hvíldum sem ég vill bara útaf einhverri reglu með hvíldartíma - sérstaklega þegar maður horfir til þess að þeir sem setja þessar reglur fá jafnmikið borgað alveg sama hversu mikið þeir vinna...

 Ég vona að þingmenn landsins fari að vakna uppúr þessari draumaveröld sem þeir lifa í og drullist til að koma til móts við bílstjóra undir eins. Þetta ástand er óviðunandi, og meðan það ríkir þá vona að bílstjórar haldi áfram sínum mótmælum - sem augljóslega eiga fullkominn rétt á sér!

„Við erum bara sektaðir“

mikilsvert

ég hef svosem ekki lesið bækurnar hans eða veit mikið um hvað málið fjallar, en mér finnst það mikilsvert að viðurkenna eigin mistök með þeim hætti sem hann hefur gert hér. Maður hefur svo sannarlega tekið eftir því í okkar samfélagi að það eru ekki svo margir sem geta viðurkennt eigin mistök, og beðist afsökunar, eins og þetta.

Hannes er svo sannarlega maður meiri í mínum huga eftir þessi orð.... 

„Ég hefði átt að vanda mig betur"

fíflalæti

mikið er ég orðinn leiður á þeim úlfalda sem gerður hefur verið úr þessari "einkaþotuleigu". Vanalega hefur þetta bara verið kallað leiguflug, og ef það hefði gengið undir því nafni frá byrjun í stað þeirrar æsifréttamennsku að kalla þetta einkaþotu-flug, þá hefði sennilegast enginn tekið eftir þessu. Þetta er mjög líklega hagkvæmari leið að taka svona leiguflug hvort eð er, þegar tekið er mið af því að það er ekkert beint flug frá Íslandi til Rúmeníu, jafnvel þó aukatíminn sem venjulegt flug tæki væri ekki tekið með inní reikninginn. Þessi umræða er bara svo heimskuleg að það nær engri átt, og að stjórnarandstaðan skuli leggjast svo ofurlágt að gagnrýna þetta í stað þess t.d. að taka undir með bílstjórum og þeirra mótmælum sýnir bara svart á hvítu hversu mikið hún er að drulla uppá bak þessa dagana. Þetta kórónar svo ungliðahreyfing vinstri grænna með þessum "leiðbeiningum" hvort sem þeir vilja meina að þetta hafi verið meint sem grín eður ei. Ég veit ekki af hverju, en af einhverri ástæðu kemur bíómyndin "Dumb and Dumber 2" uppí hugann....

Sendu ráðherrum leiðbeiningar með hraðpósti

kostir/gallar. Samantekt

Ég hef verið á báðum áttum með bakkafjöru, þó ég oftast hallist að því að vera á móti henni. Eftir að hafa séð lúxusskipin sem færeyjingar nota í svipaðar ferðir og milli eyja og þorlákshafnar varð það eiginlega draumurinn. Skip sem væri í 2 tíma milli lands og þorlákshafnar, með margfalt betri þægindi, og stærra og þ.a.l. betra á sjó og með miklu meiri flutningsgetu - ég held að það væri almennileg samgöngubót fyrir eyjamenn. Bakkafjara felur ekki í sér neina minnkun á ferðatíma, heldur færir aðeins meirihlutann af svipuðum ferðatíma yfir á bílstjóra bifreiðarinnar. Lest frá bakka til reykjavíkur myndi að sjálfsögðu breyta því, en það þyrfti eitthvað mikið að breytast í almenningssamgangahugarfari íslendinga til að svo yrði nokkurntíman að raunveruleika.

Göng milli lands og eyja hafa flesta þá galla sem bakkafjara hefur, en hefur þó fleiri kosti. Ástæðan fyrir því hinsvegar að eyjamenn vilja göng fremur en allt annað er einfaldlega sú að þau myndu borga sig fjárhagslega fyrir alla aðila - þegar til lengri tíma er litið. Skammsýni yfirvalda er hinsvegar svo svakaleg að ég sé það ekki gerast, a.m.k. ekki ef bakkafjara verður success. Jújú gleymum því að það hafa komið upp kostnaðartölur sem eru svo háar að það nær engum áttum því þessar kostnaðartölur eru ekkert annað en ágiskanir svartsýnna aðila. Á meðan engar rannsóknir hafa verið gerðar er ekki hægt að taka mark á neinum svona kostnaðartölum. Þetta eru bara ágiskanir enn sem komið er.

 

Nefni hér nokkra kosti og galla bakkafjöru sem ég sé m.v. sjósamgöngur við þorlákshöfn í núverandi mynd. Listinn er ekki tæmandi, og ég hef eflaust gleymt einhverju mikilvægu, eða hef rangt fyrir mér í einhverjum punktum... 

kostir:

+ styttir tímann á sjó,  siglingatíminn aðeins tæpur fimmtungur af núverandi siglingartíma.

+ aukin flutningsgeta með fleiri ferðum á dag. 

+ aukin flutningsgeta veldur því eflaust að minni "skylda" er að bóka sig með margra daga fyrirvara  eins og nú.

+ Svo stutt sjóferð hlýtur að valda lágum fargjöldum. Eðlilega aðeins einn fimmti af núverandi fargjaldi. 

+ fleiri ferðir valda meiri sveigjanleika í ferðatíma.

+ hlýtur að minnka kröfu um að vera mættur 2-3 korterum fyrir brottför eins og nú. 

+ í góðu veðri eru fleiri skip sem geta gengið milli eyja og bakka, en milli eyja og þorlákshafnar. Þannig er líklega auðveldara að auka flutningsgetu enn frekar yfir t.d. þjóðhátíð.

+ mun styttra í sveitarfélögin á suðurlandinu

+ möguleiki á að að stunda skóla eða vinna í eyjum fyrir fólk á suðurlandinu, og öfugt.

+ Aukin ferðamennska til eyja. Fólk á ferð um suðurlandið leggur síður fyrir sig 30 min ferð til eyja í góðu veðri yfir sumari, fremur en 3 tíma langdregna ferð frá þorlákshöfn.

 

gallar:

- stóreykur tímann í bíl til höfuðborgarsvæðisins.

- hættumeiri bílferð. hljómar ekki vel að þurfa að keyra í 2 tíma í staðinn fyrir 30 mín yfir vetrartímann til að komast til reykjavíkur. Oft nógu erfitt að komast milli þorlákshafnar og reykjavíkur eins og þetta er núna. Þó faktískt séð væri ekki ófært, eru án efa margir sem treysta sér ekki í að keyra þessa vegalengd yfir vetrartímann.

- vetrarfærð á vegum gerir keyslutímann lengri en venjulega.

- fleiri daga ófært sjóleiðina yfir árið en nú, þó umdeilanlegt.

- þó fært sé með skipi koma eflaust oftar upp aðstæður þar sem ófært er landleiðina til Reykjavíkur. 

- með höfnina undir stjórn annarra en eyjamanna er hætt við að hana verði hægt að nota þannig að viðskiptin færast frá eyjum til bakkafjöru.

- hærri bensínkostnaður vegna lengri bílferðar. 

- hættuleg sjóleið og innkoma í höfn. Gert skal ráð fyrir að skipið geti rekist í botninn í höfninni, osfrv...

- hættuleg framkvæmd. Tölvulíkön og reynsla af öðrum höfnum aðeins áreiðanleg uppað vissu marki vegna þeirrar fáránlegu hreyfingar sem er á sandinum. Hroki siglingamálastofnunar - hunsa ráðleggingar manna sem hafa raunverulega reynslu af bakkafjöru - sanna sjálfa sig ranga hvað varðar t.d. fyrirheit um hámarksölduhæð.

- skemmdir á bílum vegna sandfoks. Þó líklegt sé að það takist að hefta sandfok að mestu leyti, þá má þykja ólíklegt að það takist að fullu. Ekki heldur víst að það takist á tilsettum tíma.

- Engin forsenda fyrir bakkaflugi. Trúlega leggst allt flug á bakka niður ef að fólk getur komist ódýrt sjóleiðina á hálftíma í staðinn. Þar með hverfur líklegast einn eyja-businessinn.

Lagafrumvarp um Landeyjahöfn