nú get ég andað léttar

Jæja ... lengi er ég búinn að bíða eftir þessari yfirlýsingu. Það er þá orðið ljóst að það verður kosið fyrir lok kjörtímabilsins ... því það er alveg á kristaltæru að sjálfstæðisflokkurinn ætlar ekki að sækja beint um aðild að ESB ... jafnvel þó þeir eigi eftir að kanna möguleikann á því. Síðan er spurning hvort samfylkingin telur það nógu stórt skref í átt að ESB að kanna möguleikann á því til þess að samstarfinu verði haldið áfram - það væri svosem dæmigert

Ríkisstjórnin verður að svara kalli um breytingar

kolefni eða kolvetni?

þetta er nú fyrir það fyrsta einhver sú hörmulegasta frétt sem maður hefur séð því það er ekkert í henni, þannig séð... no details, no nothing. Þegar maður þarf að vísa í vísi til að sýna betri útgáfu af þessari frétt, þá er þetta nú orðið slæmt

http://www.visir.is/article/20081208/VIDSKIPTI06/505606656

 

Svo finnst mér nú líka sérstakt að það sé alltíeinu verið að leita að kolvetnum, þ.e. carbohydrates, en ekki kolefni frekar (sem er nú samt ekki nákvæmt heldur).

Standardinn á sumum hverjum fréttum á mbl og vísi er alveg hörmulegur. Í sumum tilvikum spyr maður sig hvort viðkomandi hafi ekki einu sinni grunnskólamenntun, þvílík er hörmungin. Samt virðist nú prentútgáfan vera skömminni skárri... allavega ekkert sem öskrar á mann þar eins og á netmiðlinum....ég vorkenni bara prófarkalesaranum ef þeir fá efnið til sín eins og það er á netinu, þeir hafa þá nóg að gera....

Breyting: Fréttin hefur nú fengið nýtt og betra yfirbragð sem ofangreint á ekki lengur við. Þar að auki þá er það rétt notkun orðsins kolvetni í þessu samhengi, þó það hafi komið spánskt fyrir sjónir þ.e. kolvetni hefur verið notað (ranglega jafnvel) um sykrur. Ég þakka fyrir þær athugasemdir.

Olíuleit í Færeyjum

Davíð í fangelsi

Davíð Oddson á náttúrulega bara skilið að fara inná Litla Hraun og dúsa þar í góðan tíma. Minna má ekki vera fyrir að hafa komið þjóðinni á hausinn!

Þessi Glitnisatburðarrás er grundvallaratriði í öllu þessu samhengi og það er augljóst að dylgjur forkálfsins í pólitíska dvalarheimilinu Seðlabankanum, þó svo hann sé svo siðspilltur og vitlaus að hann geri sér ekki einu sinni grein fyrir því sjálfur, gerði það að verkum að hlutur sem var alveg krítískt að þyrfti að ganga rétt til verks við var framkvæmdur á kolrangan máta.

Það að bankamálaráðherrann hafi ekki verið hafður með í ráðum sýnir bara fáránleika málsins - og dugir eitt til þess að menn sem áttu nokkurn þátt í því eigi að segja af sér! Það þarf enga rannsókn til að sjá að Davíð átti að upplýsa hann, og því þarf enga rannsókn til að hann segi af sér fyrir afdrifarík mistök í starfi. Mistök hans í heild eru nú afdrifaríkari en það að það ætti ekki að vera neinn vafi um það að hann ætti best heima í fangelsi. Nú er ekki ljóst hvernig aðkoma Geirs var að þessu, en það er ljóst líka að hann hefði átt að upplýsa Björgin hið fyrsta. Hafi hann ekki gert það þá á hann að segja af sér líka - menn eiga að taka ábyrgð á því sem þeir gera ... þannig á það að vera og er á flestum ef ekki öllum siðmenntuðum stöðum í heiminum fyrir utan á Íslandi.

Það er kannski ekki skrítið að Björvin vilji ekki segja af sér fyrir mistök í starfi þegar hann var "out-of-the-loop" allan tímann...

Björgvin: Spurningarmerki við Glitnisatburðarás

eina rétta í stöðunni...taka upp DOLLAR

Ég vona virkilega að stjórnvöld ætli að fara þessa leið, þ.e. einhliða upptöku annars gjaldmiðils. Geir hefur nú oft haft á orði varðandi evru-umræðu að það myndi vera skynsamlegra að taka upp dollara því íslendingar eigi meiri viðskipti í dollurum en evrum, svo ekki sé minnst á pólitíska áhættu þess að taka einhliða upp evru í óþökk við evrópusambandið.

Í því samhengi skil ég þá ekki hvað ríkisstjórnin er að pæla í einhverju risaláni IMF & co, sem er bara gerð til þess að halda þessari ömurlega gjaldmiðli, krónunni á lífi. Já, Davíð Oddson getur bara haldið kjafti ef hann les þetta - það þarf ekkert að uppnefna mig fyrir að tala illa um krónuna, hún á það nefnilega alveg skilið.... það er nú einu sinni krónan sem er aðalsökudólgurinn í hvernig komið er fyrir Íslandi núna, jafnvel þó þessir hrokagikkir sem hafa stjórnað þessu landi vilji ekki viðurkenna það.

Upptaka dollara t.d. myndi nánast leysa flest ef ekki öll núverandi vandamál Íslands, þó svo það myndi valda nokkrum öðrum auðleystari vandamálum í staðinn.

Peningamálastefnan er instrumental í því að leysa vandamál Íslands - en það liggur í augum uppi að ef einungis á að halda áfram ótrauð á sömu braut þá er ekki verið að leysa nein vandamál, í besta falli fresta þeim til seinni tíma. Fyrsta verkið í að breyta um stefnu er að skipta um seðlabankann, óháð því hvort stjórn hans hafi gert vitleysur í fortíðinni (sem hún hefur augljóslega gert). Það eitt að ríkisstjórnin sé vanfær um að skipta um Seðlabankann sýnir að hún er um leið vanfær um að koma Íslandi á réttan og góðan farveg.

Einhliða upptaka evru tæki 4 vikur og kostaði 80 milljarða

"fleyting" - yeah right...

Það eru ca 300 milljarðar af spákaupmannsgjaldeyri fast í landinu...og það verður ekki fyrr en þessum gjaldeyri verður hleypt úr landi sem raunverulegt gengi á krónuna fæst. Allar yfirlýsingar Geirs um "fleytingu" krónunnar og árangur af því eru bara útí hött ... og staðfestir bara enn og aftur í hvurslags óraunveruleika hann og aðrir í ríkisstjórninni lifa.

það er hinsvegar besta mál að neyslugjaldeyrir íslendinga verði ódýrari, jafnvel þó það verði ekki nema rétt yfir jólin...t.d. verður bensínið vonandi ódýrara....

en svo er ekkert að vita hvað gerist á morgun, krónan er svo handónýtur gjaldmiðill að það ætti ekki að koma neinum á óvart ef hún fellur um jafnvel 50% á morgun.

ég skammast mín fyrir það að vera íslendingur ef íslensk stjórnvöld láta ekki af þessari hrokastefnu og taka upp alþjóðlegan gjaldeyri - og þá miklu frekar DOLLARA en evru. Nei, Ísland er ekki stórasta land í heimi...

Fleyting gekk framar vonum

s.s. foreldrar bera ekki ábyrgð á börnunum sínum?

Með þessu er ágætur forsætisráðherra augljóslega að segja að hann telji að engin ábyrgð fylgi því að vera forsætisráðherra (já eða fjármálaráðherra þar á undan). Hann ætti þá að lækka launin, ótímabundið og afturvirkt, hjá sjálfum sér því það hafa ekki verið neinar forsendur fyrir þeim.

Að segja að hann eða aðrir ráðherrar, og þá sérstaklega sjálfstæðisflokks-megin, séu ekki ábyrgir fyrir þessu er alveg sama og segja að foreldrar séu ekki ábyrgir fyrir gerðum barna sinna.s.s. “Ég get ekki tekið ábyrgð á framferði bankamanna." = "Ég get ekki tekið ábyrgð á því að börnin mín séu illa uppalin". Þetta er alveg hliðstætt. Stjórnvöld hafa augljóslega ekki stjórnað á Íslandi ef bankarnir fá að komast upp með að setja þjóðina á hausinn, svo gott sem, og þá ættu stjórnvöld að segja af sér hið fyrsta til að hleypa að öðrum sem ráða við að stjórna "óþægu bönkunum".

Börn sem fá að komast upp með að vera óþæg eru vanalega illa upp alin. Hlutverk stjórnvaldsins hlýtur að vera að gera "börnunum" ljóst hvað þau komast upp með að gera og hvað ekki. Ef barn foreldis kveikir í húsi foreldra sinna (já og/eða  nágranna sinna um leið), þá þurfa foreldrarnir ekki bara að borga skaðann, heldur þurfa þeir að fara í ítarlega sjálfskoðun á því hvar þeim hafi mistekist í uppeldinu (ekki hvort, því það er augljóst að eitthvað hafði misfarist í uppeldinu). Mér langar ekki að trúa því að sumir foreldrar hefðu einfaldlega kennt börnunum sínum alfarið um eigin brjálæði, og ætlast til að þau borgðuðu sjálf brúsann (ásamt yngri alsaklausum systkinum sínum). Í tilviki stjórnvaldsins finnst mér augljóst að foreldrinu hefði átt að vera ljóst að börnin hefðu verið að leika sér með eld í kringum húsið og hús nágrannanna. Áhyggjur nágrannanna af þessari hegðun var alltaf svarað þannig að þetta væri nú bara lítill eldur, hann væri ekki nóg til að kveikja í einu né neinu, það væri alveg fullkomlega öruggt. En svo kom smá vindur, og eldurinn teygði úr sér þannig það kviknaði í rusli fyrir neðan húsið. Börnin kölluðu á hjálp foreldranna sem, án þess að ráðfæra sig við kóng eða prest eða slökkvlið um hvernig best væri að slökkva eldinn, ákváðu að sjálfsdáðum að reyna að slökkva eldinn með því að hella úr vodkaflöskunum sem þau voru að sötra af, jafnvel þó börnin þeirra, sem höfðu leikið sér með eld lengi og vissu alveg hvað var eldfimt og hvað ekki, grátbáðu þau um að gera það einhvernveginn öðruvísi, eins og t.d. að ná í brunatækið sem foreldrarnir höfðu  fjárfest í, og slökkva eldinn þannig. Það vita allir hvernig fór, í stað þess að slökkva hann æstu foreldrarnir bara eldinn upp með áfenginu þannig að nú kviknaði í húsinu. Þar sem vindurinn var óhagstæður kviknaði í húsi nágrannanna um leið, sem voru þó undir þetta búin vegna fiktsins í krökkum nágrannanna og slökktu eldinn áður en hann olli varanlegum skemmdum. Nú þar sem hús foreldranna var í ljósum logum sáu þeir að ekkert minna en stóra garðslangan þeirra myndi duga á þennan eld. Þeim tókst fljótlega að slökkva eldinn þar sem hann átti upptök sín með því að sprauta kröftugri vatnsgusu á eldinn, en vegna reynsluleysis foreldranna við slökkvistörf þá vildi nú bara ekki betur til en það að við það kviknaði í þakinu og öðru herbergi um leið þannig að í stað þess að eldur væri aðeins í hluta hússins  var restin að húsinu nú alelda.  Þá var slökkviliðið kallað á vettvang, en áður en þeim tókst að byrja að slökkva eldinn stöðvuðu nágrannarnir þá og vildu fá staðfest að foreldrarnir myndu borga skemmdina á grindverkinu og húsinu sínu. Nei, foreldrarnir héldu nú síður. Þeir hefðu nú alveg nóg með að borga skemmdirnar á þeirra eigin húsi, þó þau færu ekki að borga þær skemmdir sem hefðu orðið á húsi nágrannanna - jafnvel þó svo hefði verið samið um í samningi húseigendafélags götunnar sem húsin voru við. Næstu mínútur fóru í rifrildi milli foreldranna og nágranna, og á meðan var eldinum leyft að krauma. Þegar foreldrarnir sáu að ef slökkviliðið byrjaði ekki að sprauta á húsið myndi það alveg eyðileggjast gáfu þau eftir, og lofðuðu að borga það sem húseigendafélagsamningurinn kvað uppá. Nágrannarnir sættu sig við það, en þurftu samt að borga innanhússkemmdir og lána foreldrunum fyrir utanhússkemmdunum þangað til þeir hefðu efni á að borga. Þá var loks hægt að hefja slökkvistarfið, og það gekk ágætlega, svona fyrir utan það að foreldrarnir voru alltaf að vesenast með garðslönguna sína inn á milli slökkviliðsins - hvort sem það hjálpaði til við slökkvistörfin eða ekki.

Og hvað gerist næst? Barnaverndaryfirvöld taka börnin af foreldrunum og koma þeim á fósturheimili. Nágrannarnir og önnur vitni hafa kvittað uppá að börnin hafi verið að leika sér með eld lengi við húsið án þess að fá nokkuð tiltal foreldranna, heldur þvert á móti hrós fyrir að vera dugleg að leika sér. Foreldrarnir vilja náttúrulega ekkert kannast við þessar ásakanir og ásaka bara börnin sín á móti fyrir að hafa logið af sér - þau hafi verið með zippo kveikjara en ekki venjulegan kveikjara eins og þeir héldu.

 

Nei, foreldrarnir geta ekkert tekið ábyrgð á því sem börnin þeirra gera, jafnvel þó foreldrarnir hafi alveg gúdderað það sem þau tóku sér fyrir hendur...

Geir: Tel mig ekki persónulega ábyrgan

hætta að versla við N1

það á bara að hætta að versla við þetta fyrirtæki (og egó sem er sami pakki), svo einfalt er það. Ég ætla í það minnsta að sýna vilja í verki og versla ekki við egó né N1 í nánustu framtíð. Hvet aðra til að gera hið sama...

Engin þjóðarsátt um eldsneytisverð

fullkomin fífl og fávitar

þessar aðgerðir "saving iceland" gera lítið annað en að beina athyglinni að því að það eru greinilega bara fífl og fávitar sem vilja "bjarga íslandi", og eru sínum málstað því bara til vanbóta. Það gefur alveg augaleið að fólk vill ekki tengja sig við fávitahópa eins og saving iceland, og vilja fremur fjarlægjast svona vitleysinga með því t.d. að ósjálfrátt vera ósammála þeim. Hlutlaus einstaklingur varðandi álvers og virkjanaframkvæmdir er bara líklegri til að vera fylgjandi virkjunum og álverum þegar þeir sjá barist á móti því af þvílíkum eins hálfvitum og saving iceland.

saving iceland gerir sínum málstað svo slæmt að það má jafnvel ímynda sér að þeir séu á launum hjá Landsvirkjun. Það eru svosem þekkt dæmi um þetta; tóbaksframleiðendur í bandaríkjunum áttu það til að borga fólki fyrir að vera með áróður á móti reykingum, ekki ólíkt og saving iceland er að gera nú með virkjanir og álver.

Eitt er samt víst. saving iceland hópurinn er bara samansafn af hálfvitum. Ég myndi ekki taka þátt í svona vitleysu þó mér væri borgað fyrir það og ég væri alveg fullkomlega sammála málstaðnum...

Þáðu ekki boð um fund

morgunn...morgun

einu sinni horfði maður upp til blaðamanna því þeir geri aldrei stafsetningarvillur. Um daginn hló visir.is að einhverri stelpu frá Ísafirði sem kvartaði yfir því hversu illa þeir stafsettu fréttirnar hjá sér; þetta væri nú alveg fullkomlega eðlilegt að það flæktust nokkar "innsláttarvillur"  inná milli þegar keppnin sé svo mikil að vera fyrstir með fréttirnar. Það er greinilegt að þeir blaðamenn áttuðu sig greinilega ekki á því að það heyrir orðið til undantekninga að þar séu skrifaðar fréttir, þetta er nær því að vera slúðurblogg þar á bænum . Þetta er nú ekki orðið jafn slæmt hjá mbl, sem betur fer, en fer þó versnandi því miður.

 það getur velverið að í þessari frétt hjá mbl hafi það bara verið innsláttarvilla að það hafi verið "morgunn" í staðinn fyrir "morgun" (þó það sé algeng villa þeirra sem ekki kunna nóg í stafsetningu) en það breytir því ekki að villan er til staðar og það á ekki að geta gerst í svona stuttri frétt. Þegar maður er að tala um að þúsundir manna eigi eftir að lesa hverja einustu frétt sem birtist á mbl þá hefði ég haldið að það væri nú lítið mál að lesa yfir t.d. þessa einu frétt, sem tekur innan við hálfa mínútu, áður en hún fer "í loftið". Mér finnst það bara ólíðandi að "virtur" miðill eins og mbl miðli íslenskunni áfram til landsmanna með þessum hætti.

Annars skil ég Hleb alveg fullkomlega .... hversu gott sem liðið og andinn innan liðsins kann að vera þá er London einfaldlega leiðinleg borg að mínu mati, sér í lagi í samanburði við aðrar evrópskar borgir... 

Hleb í skoðun hjá Barcelona

sorglegt...

Það er svosem ekkert nýtt í þessari frétt nema það að Barrichello er nú búinn að uppljóstra um það að í Bandaríska kappakstrinum 2005 hafi hann verið "beðinn um" að víkja fyrir Sjúma. Fyrir mér eru það hinsvegar stórar og hræðilegar fréttir. Þetta átti víst að vera dropinn sem fyllti mælinn hjá Barrichello, enda var Sjúmi langt frá því að vera í einhverri titilbaráttu frekar en Barrichello eða Ferrari til þess að gera og því nákvæmlega engin rökrétt ástæða á bakvið þessa beiðni. Það var eitt að Barrichello skyldi víkja fyrir honum 2002, því þá var Sjúmi augljóslega í baráttu um titilinn og 2 stig geta virkilega skipt sköpum þegar uppi er staðið, sbr. t.d. við keppnina árið eftir 2003 eða bara árið í fyrra. En ekki nóg með að þessi beiðni hafi verið óþörf, hún var virkilega líka bönnuð, því jú þó þetta hafi kannski ekki verið liðsskipun þá var þetta klárlega ekki í anda reglunnar að biðja Barrichello um að hægja á sér.

Ég man alveg eftir þessum hrútleiðinlega 6 bíla kappakstri sem var í raun bara keppni milli Sjúma og Barrichello. Ég hef samt staðið í þeirri merkingu að Sjúmi hafi einfaldlega haft eitthvað örlítið edge á Barrichello og unnið þannig. Það getur svosem velverið að í alvörunni hafi það verið þannig, og Barrichello hafi ekkert ætlað að fara eftir þessari beiðni - en að beiðnin hafi yfirhöfuð átt sér stað eru mikil vonbrigði með mitt lið og ég fordæmi alla svoleiðis hegðun afdráttarlaust, jafnvel þó að það séu góðar ástæður fyrir því eins og 2002.

 Ef að þetta virkilega var málið, að Barrichello hafi verið beðinn um að hægja á sér eins og hann segir, þá skil ég hann líka alveg fullkomlega fyrir að vilja ekki vera þarna lengur - svona ótrúleg vanvirðing hefði sennilega fyllt mælinn hjá hverjum sem er....

Ég hef samt ekki trú á að núverandi stjórn Ferrari, með Todt kominn í burtu, muni láta nokkuð svona eiga sér stað. Domenicali virðist einfaldlega vera betri persóna en svo að hann verði með einhvern svona ógeðslegan skítshátt. Allavega þangað til að annað kemur í ljós hef ég mikla trú á að núverandi Ferrari stjórn sé fært um að ná góðum árangri án þess að haga sér óíþróttamannlega.

Svo er náttúrulega möguleikinn líka fyrir hendi að Barrichello sé að ljúga þessu og sé með þessu að reyna að vinna sjálfan sig upp í virðingu. Það verður gaman að sjá hvort og þá hvernig Ferrari svarar þessum ásökunum.... 

Barrichello var ítrekað skipað að víkja fyrir Schumacher